美斯「轉會」鳥?

放心! 唔係講緊 “MSN” 要拆夥! 而係講緊美斯嘅服裝贊助商。美斯嘅球技有幾驚為天人唔駛多講，但礙於不足 1.7 米嘅身高同貌似「張家輝」嘅樣貌，令美斯同時尚界嘅關係唔算緊密。

直到 2010 年 Dolce &Gabbana 獨具慧眼開始贊助美斯出席重要場合嘅服裝，例如 2011 年出席「金球獎」頒獎禮美斯就穿上一件品牌提供嘅紫色天鵝絨外套，令人耳目一新。2013 年，呢位「球王」更為 Dolce &Gabbana 內褲系列拍攝咗一輯尺度頗為大膽的造型照，呈現出一種「誠實」的時尚態度。

但前日美斯出席於杜拜舉行的 2015 全球足球頒獎禮 (Globe Soccer Awards)，親自領取「年度最佳球員」獎項，美斯竟然穿上 Giorgio Armani 旗下 Emporio Armani 贊助嘅西裝現身! 雖然未知美斯同 Armani 會否開展長期嘅合作關係，但美斯同 Dolce &Gabbana 關係不再密切就絕對已經成為事實了。